Hringnun hi enge a nih le ?

 Hringnun ah hian thlakhlelh tur a awm em le?
Kan nitin khawsakna ah mahni duhthua tal mai mai duhna kan nei fo țhin.
Mahse, kan duhdan ringawt chuan khawsak theihloh chang a va tam em..!
Dam kan duh a, hrisel țha tak nih kan duh laiin natna chuan min lo hual vel reng si.
Mihringte chakna vanga kan dam hun tura Pathian ruat ah chuan kum 80 chauh a ni. Thing dam chen takngial pawh kan dam zo lo a nih hi.
Hetih lai mek hian nitin kan na a, kan dam lova, kan boral mek bawk a. He khawvel ah kumhlun tur reng kan lo awm silo.
Hetiang te han ngaihtuah chang hi chuan nun hian awmzia a va neilo em..! Mahse, ngawiteh ; nun(life) hi a thlirtu a zir a ni ve mai angem ? Thil engkim mai hi a lungngaih thlak zawng hlirin em ni kan thlir ang le..? Vawinah kan dam lova, naktuk ah pawh kan dam leh thung thei; nimina dam reng kha vawin chuan engemaw vangin vawinah a boral daih thei ; hmalam hun hrethei reng kan awm silo.
Chuvangin, hetiang zawng hian i thlir dawn teh ang " engpawh ni se, kan hma lam hun chu a thim zawng ni lovin, a ĕng zawngin thlir ila, hringnun hi enge a nih a, engtia hman tur nge tih hrechiangtu chu kan ni thei mai lo maw ?"
Achang chuan, nun hian awmzia nei miah lova hriat chang i nei ve ngei ang. Mahse, inngaihtuah lungngai duh suh la, Pathian rinchhanin i nun chu hlim takin han hmang teh le..
Kan Mizo zaithiam Lalruotmoi-in a lo sak țhin " Damreina pawh lungngaihna mai, " a lo tih ang khan rei tak dam chu a țha ngei mai, tuma'n thih mai kan duh lo. Mahse, reitak dam a, hlimna neih si loh chuan, hringnun hian awmzia a nei hauh dawn lo a ni. Chuvang tak chuan vawin hian hlim la, keimahni phak tawkah hlim hram hram kan tum anga, kan bulah mi te'n awm nuam an tih theih nan hlim kan tum tlat dawn nia.
Mi hlim ngai hauh lo bulah chuan rei kan awm peih lo a ni..
Hlim reng la, dam reng bawk angche..