NGAIHDAN I SIAM HMAIN NGAIHTUAH NGUN PHAWT THIN RAWH

NGAIHDAN I SIAM HMAIN NGAIHTUAH NGUN PHAWT THIN RAWH

(Translated from - https://www.moralstories.org/think-before-you-judge/)

~Malsawmzuala Ralte, Mission veng

         Daktawr chu damlo zai nghal vat vat ngai an awm tih phone hmanga hrilh a nih hnuah, rang takin damdawi inah chuan a rawn thleng a. Kohna a dawn chu a theih ve leh chhangin, a thawmhnaw a thlak a, inzaina in lam a pan nghal a. Mipa naupang pa chu innghahna room ah daktawr nghaka vei tawn sekin a va hmu a. 

Mipa naupang pa-in a lo hmuh ve leh vin takin, "Eng vangin nge lo kal tura hun i duh rei em em? Ka fapa nunna chu hlauhthawnawm takin a awm mek tih i hre lovem ni? Mawhphurhna lian tak nei i ni tih i inhre lo zawk nge?"

Daktawr chuan nui chungin, "A pawi ka ti khawp mai, damdawi ina ka awm loh lai a ni a, kohna ka dawn ve leh theih anga rangin ka lo kal nghal a ni, i thinrim tawh loh ka beisei, tichuan, kei pawhin ka tihtur tha takin ka ti thei ang."

"Thinrim tawh loh a maw ni? I fapa chu he inzaina room ah hian awm ve mek ta se, i awm hle hle thei bik lo tawp ang. Daktawr nghah chhungin i fapa thi mek ta se, engtin nge i tih ang?" thinrim takin a chhang a. Daktawr chuan nui chung bawkin a chhang a, "Pathian tanpuinain theih tawp kan chhuah ang, nang pawh i fapa tan i lo tawngtai dawn nia."

"A tuartu nih loh chuan thurawn pek chu thil harsa a ni lo," phun chungin a la sawi zui hram a. 

Darkar eng emaw ti a zai hnuah daktawr chu hlim takin a lo chhuak a, "A va lawmawm em, i fapa chu chhanhim a ni ta!" Mipa naupang pa-in a chhan let pawh nghak hman lo va chet thuai thuai pah chuan, "Zawh tur i neih chuan nurse hi i lo be mai dawn nia."

Daktawr a kal liam hnu deuh, nurse a hmuh rual chuan, "Eng vangin nge a induhin a chapo em em mai le? Hun rei lote pawh min nghak se, ka fapa chinchang ka zawt thei tur." Nurse chuan mittui tla chungin heti hian a chhang a, "Niminah a fapa accident-in a thi a, an vui mek laiin i fapa zai turin kan ko a ni. I fapa tha taka a zai zawh ve leh a fapa vuinaa tel chhunzawm turin a kal liam leh nghal a ni."

Eng nge an nunin a tawn a, eng harsatna nge an paltlang tih i hriat loh chuan, mi chungah ngaihdan siam ngawt lovang che.