Ka nu a cancer tih ka hriat țum kha..

Thlakhat a lo liam ve leh ta reng mai. Durtlang damdawiin ah kan awmlaiin, ka nu natna engmah kan la hrelo a. A chang leh 'hrawk na satliah a ni ang.., tonsil na a niang.. engemaw vang mai mai a niang.. " tiin kan inrinsiak mai mai kha a ni a.
Mahse, durtlang damdawiin ah ni 3 kan awm hnu, tlai khat chu he thu thințhawng tak mai hi ka hre ta a  " I nu natna hi cancer a ni a, a rang lamin chhuahna lehkha (discharge card) kan siamsak cheu anga,  Zemabawk lamah in kal vat a ngai a ni. I nu hi a thi mai dawn lova, rei tak a la dampui dawn che u a ... lungngai reng reng suh u...! " an han ti ta mai kha chu aw...  bomb puak ang maiin ka bengah chuan a ring a, khami tlai zet kha chu ka lungngai takzet a ni..
Mahse, hei tunah khua a lo rei ve leh ta deuh a, ka nu pawh a zia ve leh sawt viau a.. Tin, ka nu ang leh ka nu aia serious tamtak kan han hmu deuhreng a, keimahni ah hlauhna leh zam ruk na te pawh zawimuangin a bo ve tial tial a.
Cancer natna pawh a mak lova, a hlauhawm lo zo ta vek mai hian ka hre ta.. Mitin vei theih a ni a, invenna vak a awm hran lova, vanduai leh vannei kar a ni e.. tiin Doctor te chuan min hrilh țhin.